*🌿 માણસ અને દુનિયા*

*કુરઆન કરીમમાં અલ્લાહ તઆલાએ આ વાત ઘણી જગ્યાએ સ્પષ્ટ કરી છે કે તેણે માણસોને આ દુનિયામાં પરીક્ષા માટે પેદા કર્યા છે. દાખલા તરીકે, સૂરહ મુલ્કની શરૂઆતમાં અલ્લાહ તઆલાનું ફરમાન છે:*

*ખૂબ જ બરકતવાળો છે તે (પરવરદિગાર) જેના હાથમાં (સમગ્ર) બ્રહ્માંડનું સામ્રાજ્ય છે, અને તે દરેક વસ્તુ પર સંપૂર્ણ શક્તિ ધરાવે છે. (તેણે જ) જેણે મૃત્યુ અને જીવનને પેદા કર્યું જેથી તમને અજમાવી જુએ કે તમારામાંથી કોણ સારા કાર્યો કરનાર છે. અને તે પરમ શક્તિશાળી પણ છે અને માફ કરનાર પણ છે. (અલ-મુલ્ક ૬૭: ૧-૨)*

*કુરઆન કરીમ આ બાબતમાં બિલકુલ સ્પષ્ટ છે કે દુનિયાની આ પરીક્ષાનો હેતુ એ જોવાનો છે કે કોણ જોયા વગર અને કોઈ પણ જાતના દબાણ વગર માત્ર ખુદાના ડર અને તેની ખુશી માટે તેની બંદગીનો માર્ગ અપનાવે છે અને કોણ શૈતાનનું અનુકરણ કરીને જહન્નમ (નરક) ને પોતાનું ઠેકાણું બનાવી લે છે.*

*આપણામાંથી દરેક વ્યક્તિ દરેક ક્ષણે આ જ પરીક્ષામાં જીવી રહી છે. આપણને જે ઈચ્છા હોય તે બોલવાની આઝાદી છે. જે ઈચ્છા હોય તે કરવાની આઝાદી છે. પરંતુ આ આઝાદી અમર્યાદિત નથી પણ આ દુનિયાના જીવન પૂરતી મર્યાદિત છે. એક દિવસ એવો આવશે જ્યારે દરેક માણસની જેમ આ દુનિયા પણ ખતમ કરી દેવામાં આવશે. પછી એક નવી દુનિયા પેદા કરવામાં આવશે. તે દુનિયામાં તમામ નહેમતો (સુખો) જન્નતની વસ્તીમાં ભેગી કરી દેવામાં આવશે અને તમામ અઝાબ (શિક્ષા) જહન્નમના કેદખાનામાં તૈયાર રાખવામાં આવશે.*

*પછી તે લોકો જેમણે બુરાઈના તમામ સાધનો હોવા છતાં નેકી (ભલાઈ) નો માર્ગ અપનાવ્યો, તેઓને હંમેશા માટે જન્નતમાં વસાવી દેવામાં આવશે જેથી તેઓ સવાર-સાંજ અલ્લાહની નહેમતોથી પોતાની આંખો ઠંડી કરી શકે. રહ્યા તે લોકો જેમણે પરીક્ષાની આ મહેતલ (સમય) બેદરકારી અને વિદ્રોહમાં વિતાવી, જહન્નમનું કેદખાનું તેમનું ઠેકાણું હશે જ્યાં તેઓ હંમેશા માટે રડતા અને કકળાટ કરતા રહેશે.*