ગાઝામાં ઇઝરાયેલી યુદ્ધવિરામ ઉલ્લંઘન અને ટ્રમ્પ તથા વેન્સના નિવેદનો પર અહેવાલ
ગાઝાની ભૂમિ, જે વર્ષોથી દર્દ અને દુઃખની વાર્તા કહી રહી છે, તે ફરી એકવાર લોહી અને આહના રંગમાં રંગાઈ ગઈ છે. ગાઝાની સરકારી મીડિયા ઓફિસે એક એવી સચ્ચાઈને ઉજાગર કરી છે જે માનવતાના અંતરાત્માને ઢંઢોળી દે છે. તેના જણાવ્યા અનુસાર, ઇઝરાયેલે શાંતિ કરાર પછી અત્યાર સુધીમાં 80 વખત યુદ્ધવિરામનું ઉલ્લંઘન કર્યું છે, જે તેના આક્રમક વલણ અને શાંતિના દાવાઓની પોલ ખોલે છે.
નિવેદન મુજબ, 10 ઓક્ટોબરથી અત્યાર સુધીમાં ઇઝરાયેલી હુમલાઓએ 97 માસૂમ ફિલિસ્તનીઓનો જીવ લીધો છે અને 230 ને ઘાયલ કર્યા છે. આ આંકડા માત્ર સંખ્યા નથી, પરંતુ દરેક શહીદ અને ઘાયલ વ્યક્તિ પાછળ એક ઘર, એક પરિવાર અને એક અધૂરી વાર્તા છુપાયેલી છે. ગાઝાના મીડિયાએ આ કાર્યોને આંતરરાષ્ટ્રીય માનવતાવાદી કાયદાનું ખુલ્લું ઉલ્લંઘન ગણાવ્યું છે, જે ઇઝરાયેલના લોહિયાળ ઈરાદાઓને પ્રતિબિંબિત કરે છે.
બીજી તરફ, ઇઝરાયેલી સેના પોતાના પગલાંને હમાસના કથિત ઉલ્લંઘનોનો જવાબ ગણાવે છે, પરંતુ હમાસે આ આરોપોને સંપૂર્ણપણે ફગાવી દીધા છે. આરોપ-પ્રત્યારોપનો આ સિલસિલો, જે વર્ષોથી ચાલી રહ્યો છે, તે ગાઝાના લોકોના જખમો પર નમક છાંટવા સમાન છે.
અમેરિકી રાષ્ટ્રપતિ ડોનાલ્ડ ટ્રમ્પે આ પરિસ્થિતિ પર જણાવ્યું હતું કે ગાઝામાં યુદ્ધવિરામ હજુ પણ લાગુ છે અને તેઓ ઈચ્છે છે કે પરિસ્થિતિ સંપૂર્ણપણે શાંતિપૂર્ણ રહે. તેમણે સિયોનવાદી (ઝાયોનિસ્ટ) અત્યાચારી અને ક્રૂર સેનાને ધમકી આપવાને બદલે હમાસને ચેતવણી આપી કે જો હમાસ કોઈ ઉલ્લંઘન કરશે તો તેને કડક પણ યોગ્ય જવાબ આપવામાં આવશે. ખેર! આ શબ્દો, જે આશાનું કિરણ દર્શાવે છે, તે ગાઝાના રહેવાસીઓ માટે માત્ર એક મૃગજળ (ઝાંઝવાના જળ) થી વધુ શું છે?
અમેરિકી ઉપરાષ્ટ્રપતિ જેડી વેન્સે પ્રસ્તાવ મૂક્યો હતો કે હમાસ શરણાગતિ સ્વીકારે તે પહેલા ગાઝામાં સુરક્ષા માળખું (સિક્યોરિટી ઇન્ફ્રાસ્ટ્રક્ચર) સ્થાપિત કરવામાં આવે. તેમણે કાયદો અને વ્યવસ્થા પુનઃસ્થાપિત કરવા માટે અખાતના આરબ દેશોના શાંતિ રક્ષક દળોની તૈનાતી પર ભાર મૂક્યો હતો. પરંતુ સવાલ એ છે કે શું આ પ્રસ્તાવો ગાઝાના જખમો પર મલમ લગાવી શકે છે, કે પછી આ માત્ર રાજકીય નિવેદનબાજીનું વધુ એક પ્રકરણ છે?
લોહી, આંસુ અને સંઘર્ષથી લખાયેલી ગાઝાની આ વાર્તા આંતરરાષ્ટ્રીય સમુદાયને એક જ સવાલ પૂછે છે: શાંતિના નામે આ રમત ક્યાં સુધી ચાલશે?
